Siglufjörður

Siglufjörður er nyrsti kaupstaður á Íslandi, girtur háum fjöllum á þrjá vegu. Staðurinn er þekktur fyrir mikið vetrarríki, en jafnframt veðursæld. Þekktastur er staðurinn sem höfuðborg síldveiðanna í Atlantshafi frá 1903-1965 og fyrir hið litríka mannlíf sem þar dafnaði. Nú búa á staðnum tæplega 1400 manns. Að miklu leyti ber bærinn enn svip síldarborgarinnar þótt síldin sé fjarri og íbúum hafi fækkað. Atvinnan hefur löngum byggst á sjósókn og vinnslu sjávarfangs.  Fjölmargir hafa atvinnu af fjarvinnslu sem er á vegum Sparisjóðs Siglufjarðar, einnig eru hér stórir vinnustaðir s.s. sjúkrahús, grunnskóli, leikskóli og tónlistarskóli. Í bænum eru einnig matvöruverslun, fiskbúð, bakarí, apótek, áfengisverslun, fataverslanir, byggingavöruverslun,húsgagna-og gjafavöruverslun, efnalaug, veitinga-og skemmtistaðir, gistiheimili, bensínstöð, vídeóleiga, hárgreiðslustofur og prentþjónusta auk annarra fyrirtækja og stofnana.

Á sumrin koma fjölmargir ferðamenn til Siglufjarðar í þeim tilgangi að njóta þeirrar menningar sem staðurinn hefur upp á að bjóða.

Söfnin í bænum

• Síldarminjasafnið á Siglufirði sem er 3. stærsta safn landsins, næst á eftir Þjóðminjasafni Íslands og Listasafni Reykjavíkur, hefur hlotið fjölda viðurkenninga m.a. Íslensku safnverðlaunin árið 2000, fyrst allra safna og Evrópuverðlaun safna árið 2004 þegar það var valið besta nýja iðnaðar- og tækniminjasafn Evrópu. Í Bátahúsinu og bræðsluminjahúsinu Gránu fara tíðum fram tónleikar og listsýningar. 

• Þjóðlagasetur sr. Bjarna Þorsteinssonar, opnað sumarið 2006, er safn og fræðasetur um íslensk þjóðlög og stendur fyrir hinum glæsilegu þjóðlagahátíðum.

• Gull- og úrsmíðaverkstæðið er lítið safn að Eyrargötu 16 (næsta gata norðan við Herhúsið). Safnið er verslun og verkstæði þar sem sýnd eru ótal úr og klukkur, silfursmíðagripir, verkfæri og tæki sem notuð voru á verkstæðunum eða voru til sölu í búðinni. Hlutum er vel og snyrtilega komið fyrir og þar er enn til staðar „hið sögulega andrúmsloft“. Gildi þessa er ekki síst fólgið í því að það skuli vera á sínum rétta stað - í sínu upprunalega húsi frá árinu 1929. Einstakt og merkilegt safn á landsvísu.

• Í eigu Siglufjarðarkaupstaðar er gott safn listaverka sem er prýðis úrval af því sem var að gerast í íslenskri myndlist á 6. 7. og 8. áratug tuttugustu aldar. Verkin eru sýnd á ýmsum stöðum í bænum, t.d. bæjar- og sýsluskrifstofum, sjúkrahúsinu og í skólahúsum staðarins. Listaverkasafnið er að stofni til gjöf hjónanna Arngríms Ingimundarsonar kaupmanns í Reykjavík og Bergþóru Jóelsdóttur.

Fastir viðburðir                   

• Síldarævintýrið, útihátíð sem haldin hefur verið um verslunarmannahelgina frá árinu 1991.

• Pæjumótið sem haldið er í ágúst er vinsælt og afar fjölmennt knattspyrnumót stúlkna.

• Þjóðlagahátíð hefur verið haldin árlega í júlí frá árinu 2000 með fjölda tónleika, námskeiða og fyrirlestra. Þjóðlagahátíðin hlaut hin virtu Eyrarrósarverðlaun árið 2005 í fyrsta sinn er þau voru veitt.

• Ljóðahátíðin Glóð var haldin í október 2007 í fyrsta sinn en stefnt er að því að hún verði árviss viðburður.

Útivist og íþróttir

Ekki þarf að fara langt til að komast í snertingu við náttúruna, fuglalíf er mikið í firðinum og fjöllin bjóða upp á gönguferðir yfir í næstu firði og dali.

• Skíðasvæði Siglfirðinga er í Skarðdal og aðstaða til skíðaiðkunar hin besta.

• Golfvöllur er á Hóli innst í firðinum.

• Góð innisundlaug og nýr tækjasalur er við íþróttahús bæjarins.

Brot úr sögu bæjarins              

Þormóður rammi er landnámsmaður Siglufjarðar og gaf honum nafn eftir fyrstu siglinguna inn fjörðinn. Hann reisti bú sitt á Siglunesi.  Um aldir var miðstöð byggðarlagsins á Siglunesi með kirkju og þingi, en frá árinu 1614 hefur kirkjan verið á Hvanneyri (Siglufirði) þar sem kaupstaðurinn reis síðar. Á seinni hluta 19. aldar var á Siglufirði miðstöð hákarlaveiða fyrir Norðurlandi og réði því hið framúrskarandi hafnarlægi og nálægðin við miðin. Árið1903 urðu mikil tímamót á staðnum þegar Norðmenn hófu síldveiðar við Norðurland. Síldarævintýrið mikla var hafið, Siglufjörður stækkaði ört og 40 árum síðar var Siglufjörður orðinn 5. mesti þéttbýlisstaður landsins og þekktur sem höfuðborg síldveiðanna í Atlantshafi. Hundruð innlendra og erlendra skipa höfðu þar viðdvöl á sumrin í meira en 60 ár. Þótt síldin hafi horfið af Norðurlandsmiðum þá ber staðurinn enn skýr merki hinna stórbrotnu atburða síldaráranna.