Ljósmyndarinn Kevin Cooley frá New York, sem dvaldi í Herhúsinu í nóvember í fyrra ásamt Bridget Batch, hefur nú bætt heimasíðu sína og má þar m.a.sjá afraksturinn af Íslandsdvöl hans. Hann og Bridget tóku líka vídeómyndir hér og á Lágheiði.
Lin de Mol er stödd hér ásamt aðstoðarkonu sinni Hönnu, en hún vinnur að gerð bókar með teikningum og ljósmyndum sem hún hefur tekið á Írlandi og nú hér á Íslandi. Lin býr í Amsterdam en hún hefur sýnt og tekið þátt í fjölda samsýninga um allan heim.Eins og sjá má á heimasíðu hennar hefur hún líka tekið stuttmyndir og gert innsetningar.
Gestir septembermánaðar í Herhúsinu eru listafólkið og hönnuðirnir Julia Lohman og Gero Grundmann - munu þau í dag segja frá vinnu sinni og dvölinni hér kl: 17 í Herhúsinu. Allir eru velkomnir. Hjónin Júlía og Geró eru þýsk en búa í London. Vinna þeirra spannar vítt svið vöruhönnunar, skúlptúrgerðar, auglýsingateiknunar, prentverks og myndskreytingar. Verkefni þeirra fjalla gjarna um samband mannkyns við náttúna og hvernig maðurinn hagnýtir sér náttúruleg og tilbúin efni. Verk þeirra eru sýnd víða um heim og starfa þau reglulega sem kennarapar í Konunglega listaháskólanum í London, Listaskólanum í Norwich og öðrum háskólum víða um Evrópu.
Bresku hjónin Dan og Trish Scott sýna í Herhúsinu á morgun, föstudaginn 28.ágúst , kl.17. Þau hafa virkjað hæfileika margra bæjarbúa undanfarnar 4 vikur og verður mjög forvitnilegt að sjá útkomuna.
